Nasjonalarkivet

Korleis var det å starte eit nytt liv i Amerika? No kan du lese om opplevingene til dei norske utvandrarane med deira eigne ord.   

På 1800- og 1900-talet sende mange norske utvandrarar brev heim til familie og venner om livet i det nye landet. Breva bidrog til at fleire følgde etter, og til at talet på norske emigrantar nådde nesten éin million på under hundre år.   

På slutten av 1920-talet og utover vart breva samla inn, og vart ein del av Historiografisk samling ved Norsk Historisk Kjeldeskrift-institutt. Dei fleste breva vart skrivne av med skrivemaskin, medan originalane stort sett vart sende tilbake til eigarane. 

Søk i breva

Arkivverkets samling med amerikabrev består av over 17 000 bildesider med handskrivne og maskinskrivne brev. Breva har vore tilgjengelege på Digitalarkivet i fleire år. Det nye no er at vi i samband med markeringa av Migrasjonsåret 2025 har maskinlest breva slik at du også kan søkje i dei.  

For brev og avisutklipp med maskinskrift og trykt tekst, er avskrifta nær 100 prosent korrekt. For handskrivne brev er all tekst mogleg å søkje i, men berre personnamn, stadnamn og datering er kvalitetssikra manuelt. Ein stor takk til dei frivillige som har bidrege i dette arbeidet.