Det er eit aukande behov for kompetanse som kombinerer helsefag, data og teknologi, medan helsevesenet står midt i ei omfattande digital omstilling. Auka bruk av helsedata og kunstig intelligens gir nye moglegheiter for betre behandling, meir presis diagnostikk og meir effektive tenester. I tillegg treng både leiarar, klinikarar og teknologar meir kunnskap om feltet. For å lykkast er det avgjerande å byggje kunnskap om data, metodar og etiske problemstillingar.

Emnet Helsedataanalyse og kunstig intelligens er utvikla for å møte nettopp dette behovet. Studentane vil få ei praktisk tilnærming til faget, med innføring i maskinlæring, analyse av både strukturerte og tekstbaserte helsedata, og tolking og formidling av resultat. Undervisninga blir knytt tett til reelle problemstillingar frå helsesektoren, slik at deltakarane kan bruke kunnskapen direkte i praksis.

Samarbeidet mellom TSH, Norsk helsearkiv og NTNU har vore avgjerande for utviklinga av studietilbodet.  NTNU har ansvar for det faglege innhaldet, medan TSH fungerer som ein viktig regional læringsarena. Norsk helsearkiv har bidrege til innhaldet i studiet, og vil i tillegg stille med teknisk støtte og rettleiing under førelesingane.

Etableringa av emnet er også viktig for Nord-Østerdalen. Ved å tilby høgare utdanning lokalt blir fagmiljøa styrkte og tilgjengelegheita til relevant kompetanse auka. Samtidig har satsinga ein tydeleg nasjonal ambisjon: å bidra til betre utnytting av Noregs sterke posisjon innan helsedata, og leggje grunnlag for innovasjon, verdiskaping og betre helsetenester.

Gjennom emnet Helsedataanalyse og kunstig intelligens tek TSH, Norsk helsearkiv og NTNU eit konkret steg i retning av å byggje den kompetansen som trengst for å realisere dette potensialet.

Norsk helsearkiv sender sjølv fleire tilsette til studiet. Med denne kompetansen kan vi gjere dataa i Helsearkivregisteret meir forskarvennlege og leggje til rette datasett meir effektivt og på nye måtar.

Meir informasjon om studietilbodet finn du her. Søknadsfrist er 15. juni 2026.